معجزة حقيقية : انا شايفاك انا عارفاك انت البابا كيرلس

سمعت كتير معجزات تمجد فيها الله بشفاعة القديس البابا كيرلس السادس فى الطاحونة ،

ولكن كانت اول مرة اشوف معجزة تحصل قدام  عينى  وعشت تفاصيلها  و حسيت بيد الله تعمل بشفاعة هذا القديس 

ودى شهادة حية عن معجزة للبابا كيرلس السادس فى الطاحونة.

فى مرة من المرات وانا موجود فى الطاحونة وكنت قدام  باب الطاحونة مباشرة لقيت ست ومعاها راجلين لبسهم بسيط ( صعايدة ) والرجالة مسندة الست دى ومدخلينها الطاحونة وحالتهم كانت صعبه شكلهم 

متضايقين وزعلانين اللى عرفته ان الست دى جالها مرض خلالها مش بتشوف واصابها بالعمى وهما جايين القاهرة علشان تتعالج او تعمل عملية وانهم لفوا على دكاترة كتير وان الموضوع صعب ،

 دخلوا الطاحونة وقعدوا شوية وبعد شوية سمعت صوت عالى بيزعق بيقول ايوا انا شايفاك انا عارفاك انت البابا كيرلس انا شايفاك والست فى حالة شبه هيستيرية فدخلت علشان شوف فى ايه ، لقيت الراجلين بيبكوا والست فى ذهول بتقول انا بشوف انا بشوف وكل اللى جوه المزار بكوا من المنظر والناس اتلمت عليها والناس كان بتاخد منها بركة ، بصراحة انا حسيت باحساس اول مره اشعر به وكأن فى حاجة لمستنى كلى ، وسألت واحد من الرجال اللى معاه وقالى انها اتعمت وجينا القاهرة علشان نشوف دكتور كويس وتعبنا من اللف لكن البابا كيرلس عملها معانا ، ودى كان اول مرة اشوف حاجه زى دى تحصل قدام عينى بعدين طبعا شوفت حاجات كتير هحكيهالكم بعدين ,

طوباك ايها القديس العظيم البابا كيرلس شفاعتك تكون معنا . امين .

تصنيف : معجزات