معجزة : هخليها عليك يا بابا كيرلس

ارسلت لنا الاخت / دميانة .ع .ع – القاهرة .

 فى يوم الجمعة الموافق 15 / 8 / 2014م

السن / 16 سنة – القاهرة.

الحكاية انا كنت قاعدة قدام التليفزيون زى كل يوم ، وفجأة حسيت بوجع فى القفص الصدرى من الناحية اليسرى بس مهتمتش فى الاول قولت ده وجع بسيط وهيروح لحاله ، بس الوجع زاد عليا اوى فقلت لبابا ، بابا قالى : ورينى مكان الوجع ولما شافوا

قالى فى اختلاف بين العظمة اليمنى واليسرى فى القفص الصدرى والاختلاف هو ان العظمة اليسرى اكبر ، وقال لازم بكره نروح للدكتور مع العلم ان بابا بيشتغل موظف فى مستشفى ، وفعلا رحت معاه تانى يوم الصبح واتعرضت على دكتور فرج ابراهيم اخصائى الصدر وطلب مننا عمل اشعة مقطعية وبالفعل عملتها ولما رحنا عشان نعرض عليه الاشعة قال : لا دى مش موضحة كويس وطلب مننا عمل اشعة مقطعية ثلاثية الابعاد وبالفعل عملتها يوم الاربعاء الموافق 9 / 7/ 2014م ، واول ماشافها قال هنعمل عملية يوم السبت الموافق 12 / 7 / 2014م الموافق لعيد الرسل ،  والعملية عبارة عن اخذ عينة من الضلع الايسر وانا كنت خايفة قوى علشان دى اول مرة اعمل عملية بس كنت بصلى واطلب شفاعة حبيبى وشفيعى البابا كيرلس وقولتله انا هخليها عليك وفعلا عملت العملية لكن بعد مرور اسبوع طلب منى الدكتور عمل اشعة رنين لمعرفة ادق التفاصيل وبالفعل عملتها وبان فيها ورم لكن نشكر ربنا الورم طلع حميد بس كان لازم نعمل عملية ونشيل الورم علشان ده ممكن يتحول لحاجة مش كويسة بعد كده  ، وده كان راى الدكتور فرج ابراهيم اخصائى الصدر والدكتور محمد جميل استشارى جراحة الاورام ، وقرروا انهم يشيلوا الورم كله ويشيلوا ضلع كامل وكان المفروض انى هنقل دم وهركب انبوبة زجاجية وكمان سرير فى العناية المركزة ولكن بشفاعة العدرا وحبيبى البابا كيرلس لما دخلو يعملوا العملية لقوا الورم فى مكان لوحده بعيد عن الضلع واخذوا الورم فقط ولم يتم اى شئ من الذى كان سوف يحدث وكل هذا ببركة العدرا وحبيبى البابا كيرلس شفاعتهم معنا امين.

تصنيف : معجزات